ភ្នំពេញ៖ ថ្ងៃទី១៤ ខែកុម្ភៈ ឆ្នាំ២០២០ មកដល់ ថ្ងៃទី១៤ ខែកុម្ភៈ ឆ្នាំ២០២២ មានរយៈពេល ២ឆ្នាំគត់ដែល នាយករដ្ឋមន្ត្រីកម្ពុជា សម្តេចតេជោ ហ៊ុន សែន បានបង្ហាញក្ដីស្រលាញ់ដែលធ្វើឱ្យពិភពលោកភ្ញាក់ផ្អើលដោយ បានអនុញ្ញាតឱ្យនាវាទេសចរណ៍អាមេរិក «Westerdam» ចូលចតនៅកំពង់ផែក្រុងព្រះសីហនុ ខេត្តព្រះសីហនុ។

នាវានេះដឹកមនុស្សសរុបជាង ២ ០០០នាក់ បានចាកចេញពីទីក្រុងហុងកុង ប្រទេសចិន ហើយត្រូវបានអាជ្ញាធរ កោះតៃវ៉ាន់ ហ្វីលីពីន ជប៉ុន កូរ៉េខាងត្បូង កោះហ្គាំ (អាមេរិក) និងប្រទេសថៃ បដិសេធមិនឲ្យចូលចតឡើយ ដោយសារតែព្រួយបារម្ភថា ក្នុងចំណោមមនុស្សរាប់ពាន់នាក់នៅលើនោះ អាចមានផ្ទុកជំងឺកូវីដ-១៩។

ថ្ងៃទី១៤ ខែកុម្ភៈ ឆ្នាំ ២០២០ ក៏ត្រូវនឹងថ្ងៃ «ថ្ងៃបុណ្យនៃក្តីស្រឡាញ់» សម្តេចតេជោមិនត្រឹមតែតែអនុញ្ញាតឲ្យនាវា Westerdam ចូលចតប៉ុណ្ណោះទេ សម្តេចក៏បានអញ្ជើញទទួលស្វាគមន៍ដោយផ្ទាល់ចំពោះវត្តមានអ្នកដំណើរ អមដោយផ្កាកូលាបថែមទៀតផង ដែលជាការបង្ហាញក្តីស្រលាញ់របស់កម្ពុជាទៅកាន់ពិភពលោក បើទោះបីជាកម្ពុជាជាប្រទេសតូច ប៉ុន្តែមានចិត្តទូលាយ។

ការដែលអនុញ្ញាតឱ្យនាវា Westerdam ចូលចតពេលនោះបានធ្វើឱ្យពិភពលោកភ្ញាក់ផ្អើលនិងកោតសរសើរកម្ពុជា ដែលហ៊ានទទួលនូវអ្វីដែលគេមិនហ៊ាន ខណៈអ្នកដំណើរដែលចុះពីលើកប៉ាល់បានបង្ហាញនូវការរំជួលចិត្ត រហូតអ្នកខ្លះស្រក់ទឹកភ្នែកថែមទៀតផង។ ពួកគេបានកោតសរសើរចំពោះកាយវិការរបស់នាយករដ្ឋមន្ត្រី ក៏ដូចជាពលរដ្ឋកម្ពុជាទាំងមូល ដែលប្រកបដោយមនោសញ្ចេតនាដ៏ជ្រាលជ្រៅនេះ។

នាពេលនោះដែរ អតីតប្រធានាធីបតីរបស់អាមេរិកលោក ដូណាល់ ត្រាំ បានសរសេរលើបណ្តាញសង្គម Twitterថា៖ «សូមអរគុណដល់ប្រទេសកម្ពុជាដ៏ស្រស់ស្អាតដែលបានទទួលយកនាវាទេសចរណ៍ Westerdam ចូលចតកំពង់ផែរបស់អ្នក។ សហរដ្ឋអាមេរិកនឹងចងចាំគុណធម៌របស់កម្ពុជា»៕